開爐日，先同大家講聲新年快樂！
不過喺office就唔多快樂，雖然話一個月唔夠又放多幾日新年假，須知上巿公司的宿命就係過咗年就要準備舊年條數。無錯，敝公司係十二月計year end的。而全年業績又出得零舍早，介乎喺兩位李生——國寶同超人中間，兩個半月去執十二個月嘅數，仲要有晒圖表、巿場數據、powerpoint同埋老細講稿，你都咪話唔頭痕。
「家姐，printer返咗稿喇」。
除咗份通告之外，無乜人睇嘅「大書」——即係份年報（順帶一提，「細書」即係中期報告，薄身好多），先至最揦脷。大書通常遲通告半個月出，你以為一月頭開始做已經好早？哈，舊年十二月頭我哋已經要同designer house傾design，用咩風格同style，要配合乜嘢相。太似舊年嗰本又唔得，完全唔似樣又唔得，有時真係勁羨慕本嘢可以hea出嗰啲同業。
同designer house傾掂晒啲design就開始同printer合作，我哋一路掟啲內容畀佢哋，佢哋就放落個template，偏偏呢啲位先keep住出事。
「喂點解呢一頁啲字size係9，下一頁明明係同一個section但size變咗8？」
「跨版兩個框點解會爭咗3mm？好明顯喎」。
「喂我入畀你嗰張圖line graph，灰色線同藍色線點解掉轉咗㗎？」
就係呢啲嘢都會執成兩個幾月，而且越多內容入落去就會越多錯，到cut off嗰日我同Connie要落printer幾乎不能倖免。幾乎要sign off一刻先發現appendix啲細表左上角「千美元」字體有啲大有啲細，統一番嗰廿幾個表嘅size，再等得printer改同print同翻check，sign off得嚟已經1點，然後聽日準時返工唔該。
當然呢啲一年只得嗰一次，而且拎住本墨水味勁攻鼻嘅大書時，其實又真係鬼死咁有滿足感。代各公司奉勸所有股東一句，收到公司啲大書睇多兩眼呀，有血有汗㗎真係。
雖然講到咁大工程，業績同年報呢啲畢竟只係定期工程，有晒框架有晒時間表跟住去做。最驚反而係啲預計唔到嘅嘢，例如啲客出事畀唔到錢，或者發生工業事故，無得準備嘅事先係最得人驚。
同做人一樣，返工放工辛苦有咩大不了？至少所有嘢都係預計之中。2016年有唔少生離死別，但至少世界照常運作，我同你都好哋哋繼續做到隻狗咁，其實已經好感恩。
感性完繼續chur業績，家姐我農曆年尾嗰幾日仲要飛日本㗎，呵呵呵！
【家姐教路】新一年又開始，有啲信用卡又再接近到期日喇。唔用就記得同銀行講定唔續，唔係又一張新卡會送到。最近好多卡都有哩數優惠，唔少人都開多咗新卡。提提你哋，越多信用卡，信貸紀錄會越差㗎，你張張都定期找數都係咁話。信貸紀錄越差，去銀行借按揭、借私人貸款個息都會高啲㗎。
關家姐
http://fb.com/kwangajei
本欄逢周三刊出