《老夫子》作者王家禧逝世，特首梁振英噚日傍晚喺facebook話，《老夫子》係香港一代傳奇，對王家禧家人表示慰問之時，亦講吓《老夫子》嘅回憶。
梁特話細個因為家境問題，買教科書都有啲困難，自然無餘錢買漫畫書，唯一有機會睇漫畫書，就係去理髮店，「尤其是去設在皇后大道西一條橫巷的理髮店理髮。老闆很懂得招徠，《老夫子》漫畫書大量供應，因為最受大人和小朋友歡迎」。
佢仲話漫畫中嘅3個主角老夫子、秦先生、大番薯，成日俾細路仔用嚟起花名，又話近年最常見到《老夫子》嘅地方係中環「中國會」嘅電梯，因為嗰度成日掛住相關漫畫，每次去中國會食飯都會仔細look。
咁啱得咁橋，上屆特首選舉期間，有人就將3位參選人，即係梁特、唐英年同何俊仁出席論壇嘅相惡搞成秦先生、老夫子及大番薯，維妙維肖，人人爆like。