新年伊始，一班傳媒老鬼老友開記者招待會，宣佈開辦一個新聞網站，叫做「眾新聞（hkcnews.com）」，今時今日，新聞網站眾多，本港日報又紛紛設立網站，發放即時新聞，「蘋果動新聞」聽講係全港點擊率最高嘅，冇一個年輕人唔睇。在此情況下，傳媒老鬼身經百戰，經驗豐富，還要加入戰場？夠唔夠錢去蝕呀？譬如人地「香港01」有大水喉撐住，人馬眾多，「眾新聞」憑乜嘢去同人爭呀？
先睇陣容，眾新聞嘅出版公司係「公民記者有限公司」，係一間註冊NGO，屬非牟利團體，正申請為「免稅團體」，但稅務局近年對呢類新申請睇得好嚴，相信未必獲得批准。發起人方面，有劉進圖（前明報總編輯）、麥燕庭（前記協主席）、陳伯添（前信報執行總編輯）、姜國元（前蘋果及明報總編輯，即安裕），馮玉蓮（前港台新聞及時事總監）、岑倚蘭（記協主席）、楊健興（前南華早報政治版編輯）、馮德雄（前有線電視新聞老總）、李月華（前蘋果日報新聞部高層，創立台灣爽報及蘋果動新聞）、陳韜文（中大新聞與傳播學院榮休教授），呢十位傳媒名人，位位猛料，可惜因為種種不同原因，在今天政治經濟環境中，在印刷媒體已無大顯身手嘅空間，全部下崗下馬，對香港新聞界嚟講，以及對全港讀者嚟講，都係一個大損失。
左丁山與上述十人相識已久，其中有啲更是經常碰頭，知道佢地埋班搞「眾新聞」之後，向一位最熟嘅查問：「你地嘅經費從何而來，因住俾人唱衰，話係外國勢力支持！」老友說：「君子坦蕩蕩，我地係擔保責任有限公司，每年會公開賬目，供公眾監察。開辦費有百零萬港元，係三年前劉進圖不幸被斬傷後，佢嘅校友朋友捐款做懸紅賞金，但破案後無人認領，劉進圖想回款俾捐款人，但人人當係既出之物，冇要返，劉進圖於是諗到要拎出來搞一啲有意義事情，搵埋我地商商量量，大家一致話香港目前好需要獨立資金，無黨派，編輯自主嘅新聞平台，為大眾提供客觀準確，公允嘅優質新聞及評論，刊出精闢新聞分析及解讀，於是成立公司，建立新聞網站。」但百零萬一陣就用完，點撐落去？熟人話，眾新聞將透過眾籌網站呼籲眾籌，又在fb設專頁，已有一萬五千多個like，如果有人訂閱（每月一百元）嘅話，有4000名訂戶就可以勉強維持落去，有錢出糧俾10位前線記者編輯。大計就是如此，得唔得就要睇公眾反應嘞，讀者如有興趣，不妨上網搜尋吓。