雖然有被DQ危機，但劉小麗仍然盡好立法會議員本份，噚日朝早佢出席財政預算案諮詢會議後，就同一班5歲讀緊幼稚園嘅小朋友見面（圖），講吓立法會職責等，做番佢嘅老師本業。
叫689跟細路學嘢
小朋友童言無忌，反而令人發人深省。小麗話喎，佢同班小朋友講，議員嘅工作包括向政府官員提供意見，例如話畀政府聽，應該點樣用錢，佢仲即場做個小民調，問小朋友政府應該將錢用喺邊啲人身上？
嘩，呢班小朋友踴躍發言搶住答：「應該使喺窮人身上！」小麗隨即問嘞：「咁使喺老人家身上好唔好呀？」小朋友則一致話「好」；至於使唔使用喺有錢人身上？佢話小朋友話「唔使」喎！
經過呢場互動，小麗老師感受好深，記起梁振英曾經借疑似虛構嘅5歲小朋友過橋，合理化盲搶地做法，而真正嘅5歲小朋友，就現身立法會講出佢哋真正嘅訴求，佢力促689找數，並向真‧5歲小朋友學習！