通常曼聯賽後出現洗版，一係就輸波，一係就爭議性贏波；周一紅魔作客2:0擊敗「槌仔幫」韋斯咸，聯賽六連勝，不過比賽過程就極多爭議判決，香港唔少討論區以至面書嘅「反X大聯盟」好鬼不滿，連我求大俠呢個中立球迷都睇到火都嚟，「4-4-2-4」、「謝四哥少林足球」等改圖出番晒嚟，但摩連奴啋你都儍，三分已袋最緊要。
鍾斯演技好累菲侯利領紅
甸恩一向被視為親熱刺球證，今仗主吹韋斯咸對曼聯，到底係偏幫曼聯定係真係盲吹，真係好難有定案，因為錯誤判決都有喺雙方身上出現；不過呢場波最爭議係15分鐘槌仔幫中場菲侯利推波至曼聯禁區頂，但就推甩腳，曼聯後衞菲爾鍾斯殺到，兩人雙雙飛鏟，鍾斯就好似跳水運動員咁，倒地自轉三周半，再加多個就嚟死嘅表情，相反菲侯利眼光光坐喺草地，鬥演技梗係輸晒啦，甸恩就拎張紅牌送畀菲侯利，鍾斯任務完成咪又企番起身打足全場。
如果甸恩執法從嚴，理論上冇唔妥，不過兩分鐘後曼聯中場連格喺中線附近從後鏟向韋咸中場高耶迪，但甸恩竟然牌都冇張，口頭警告了事。
三人齊越位伊巴入球有效
多打一人嘅曼聯唔係完全佔優，要靠第250場上陣嘅門將迪基亞左飛右撲保不失，紅魔苦戰至63分鐘由桑馬達開紀錄，過程冇咩問題，但第二個入球就大問題好多，韋咸後衞省中安達靴里拉，個波反彈入禁區，三名曼聯球員處越位，唔知旁證係色盲定近視，竟然冇舉旗，伊巴有理冇理射咗入網，幫曼聯贏到2:0，個人聯賽入球增至13個㖭。
韋咸領隊比歷賽後好勞氣，話咁早已經趕一個球員出場，就等於抹殺球隊嘅機會，仲話一定會上訴。不過曼聯三分已袋就真係理得你，雖然六連勝後仍然排第六，不過追至第五嘅熱刺同分，重返前四真係唔係夢，爭在賽後未講埋多謝甸恩咋。