英超球證水準低落都唔係新常態，利物浦周一作客慘被新特蘭逼和2:2，係呢日唯一失分嘅前列球隊，對爭標以至爭前四都幾傷，領隊高路普賽後就怪責球證，枉判罰球間接令「黑貓」有第二個12碼，不幸中之大幸係因傷提早離場嘅占士米拿同史杜列治傷勢都唔算嚴重。
力爭五連勝嘅紅軍，原本有好開始，19分鐘史杜列治接憑洛夫雲撻Q射門，門前加一頭先開紀錄，之後黑貓由迪迪亞尼當博得12碼，迪科爾主射建功，追成1:1。下半場對紅軍嚟講，真係成也文尼，敗也文尼，呢位塞內加爾國腳沙迪奧喺72分鐘又係靠角球，藉對手迪積洛保積錯誤後傳，沙迪奧文尼門前建功，紅軍再度領先，但始終頂唔到尾。
84分鐘迪科爾博到禁區頂罰球，施巴斯坦拿臣主射省中排人牆嘅文尼隻手，球證判12碼，迪科爾再度中鵠，幫黑貓逼和2:2，搶番一分。
高路普賽後就好不滿咁話：「輸兩個12碼真係唔好受，特別係第二個12碼嘅出現，源於迪科爾喺禁區頂博得罰球，但事實盧卡斯根本掂唔到佢。」紅軍失兩分，仲有左閘占士米拿同前鋒史杜列治先後傷出，好彩高路普話佢哋傷勢都唔嚴重，只係安全計收起佢哋。
