憑着愛，佢信有出路；憑着愛，薯粉來傾訴……上個月12號辭職，數數手指都就嚟一個月，點知中央依然未批准辭職，亮紅燈之說滿天飛，但似乎無礙財政司司長曾俊華嘅備戰心情，佢話過㗎嘛，港人「曾踏遍刺腳的彎路」，最後都能夠找到出路，勉人又自勉，等開綠燈期間四出落區集氣，噚日恭喜神奇小子曹星如榮登WBO世界第一時，意有所指高呼「Knock them out!」睇嚟學過功夫嘅佢戰意好濃，怕且林鄭同葉劉，都要睇住嚟噃！
曾蔭權話過knock out人
鬍鬚曾一直好撐曹星如，身在香港時會入場支持，就算唔喺香港，都會賽前越洋打氣，所以得悉曹星如榮升no.1，自然都好高興，第一時間喺facebook轉載報道報喜，留言「First for Hong Kong. Knock them out!」嘩，喺特首戰遇上強敵之時，鬍鬚曾呢句「Knock them out！」真係更有弦外之音。
八方記得，2005年曾蔭權參選特首爭取提名時，都講過如果可以喺第一回合knock out對手，唔使等到第九回合，唔通曾氏兄弟對knock out人，別有一番心得？
而繼早前落區探訪基層後，鬍鬚曾繼續落區收集民情，到訪直資男校英華小學，同一班小學生交流。從英華小學喺校網上載鬍鬚曾到訪嘅相片可見，鬍鬚曾喺同學帶領下參觀校園，包括課堂、音樂室、勞作室等，又同學生用平板電腦玩模型車。雖然未必一如特首梁振英咁鍾意調理農務，但鬍鬚曾到訪學校時，亦有參觀花圃，欣賞學生務農成果。
嗱嗱嗱，港澳辦主任王光亞都話啦，特首條件之一係受港人擁護，唔聽市民心聲谷吓民望又點符合資格？怕且戰意高昂嘅鬍鬚曾，落區活動陸續有嚟。咁又唔係冇好處喎，好過留喺屋企時，接連有愛國愛港陣營人士上門勸退咁掃興嘛，見吓粉絲振作士氣唔好咩？
識睇睇留言
Roger Chow：With the help of all of us, I suppose you or Mr.Wu can sure knock them out including the witches!
Babb Wong：語帶相（雙）關，財爺好波
Yue Lim Lam：支持薯片叔叔！
Yick Shing Chan：乜咁威！如果可以把689當沙包砌幾拳，包好多香港人拍爛手掌……財爺無孔不入展實力，親民畀核心知！
YW Lam：Yes!!!! John you can knock down all the morons around you
Kwok Kei Thomas Chan：幾時到財爺做特區一哥？
資料來源：互聯網
李八方
mailto:[email protected]