英超球證當中，48歲嘅甸恩出晒名，因為最富爭議性。我求大俠相信最憎佢嘅肯定係阿仙奴球迷，因為盛傳佢係熱刺迷，唔只一次吹熱刺比賽嗰陣慶祝熱刺入波。
喺2012年嘅北倫敦打吡同埋上季熱刺對維拉場波，鏡頭都影到甸恩疑似喺熱刺入波後慶祝，令人懷疑佢係捧熱刺。其後佢吹阿仙奴對車路士場波，火藥味十足，車仔前鋒迪亞高哥斯達（DC）係咁挑釁哥斯尼同基比爾包列斯達，但甸恩都冇趕佢出場。前年有槍迷喺網上發起簽名運動，要求甸恩唔好再吹阿仙奴嘅比賽。今季甸恩吹咗熱刺三場比賽，熱刺三場贏晒之餘，三個對手都有人被逐，其中喺上月底，熱刺贏修咸頓4:1就有列特文領紅。最令人懷疑嘅係，當熱刺嘅迪比利被換走嗰陣，特登走去同甸恩握手（小圖）。