香港首個轉廢為能嘅環保設施、位於屯門曾嘴稔灣路嘅T．PARK【源．區】，舊年5月開幕以嚟吸引唔少機構、組織同市民到訪，截至噚日原來參觀人數已經突破4.1萬人，似乎市民對呢個集污泥處理廠、海水淡化設施、環境教育中心、spa同餐廳於一身嘅設施都好捧場。
T．PARK裏面嘅輕食餐廳源．茶亦都以升級循環再造為主題，主要家具都係由舊物料例如舊灣仔碼頭防撞木同學校舊桌椅再造而成，而喺生產過程中因為有瑕疵而報廢嘅杯，亦被轉化為餐廳特色餐具，夠晒環保。
更加巴閉嘅係T．PARK仲喺設計方面攞咗幾個獎，最近就獲香港設計中心舉辦、2016年DFA亞洲最具影響力設計獎嘅大獎以及可持續發展大獎，亦喺環保建築大獎2016嘅商業樓宇類別攞到優異獎。