舊年2016年，如要用四字去形容，必定係「爆到七彩」。由李斯特城奪英超冠軍開始，脫歐、特朗普等，一路爆爆爆，「專家預測」、「內幕堅料」錯晒，爆到年尾，連「贏硬」嘅特首梁振英，特首選舉閘都入唔到。
意料之外，呢個就一定，不過係件好事。孫柏文財演生涯最「出位」嗰一刻，必定係2011年醉酒上鏡嗰次。咁大嘅錯誤，我當然之後痛定思痛去檢討。而其中一個令我出事嘅原因，就係世界啲權貴話事階級，淨係不斷靠例如量化寬鬆、零息政策去大派救唔到人嘅「水泡」。
當啲「水泡」政策開始俾啲聰明人搵到屈機位，瘋狂屈機吸着數，不但搞到貧富懸殊（呢個其實除咗啲左膠外，老百姓冇所謂），而係有嗰種不勞不博不用腦都有收穫。
好喇，政府上下（包括啲民選議員）嘅填鴨官員就諗住「治標就係政績」，推出一個又一個更擾民、添煩添亂嘅措施。內地有印鈔「救」經濟、銀行後，見走資，就落閘放狗。美國唔使啲銀行執笠後，連啲冇做錯嘅銀行都要管到瞓低。歐盟仲離譜，做錯後，就話網媒抹黑，所以要監管網上資訊。香港則有樓價升得快，所以抽特別印花稅。
2016年前，真係廢有廢做，膠有膠撐，奸有奸屈機。
就係咁，天下之亂，邱吉爾話齋，2016年唔係結局，更唔係結局嘅開始，不過係開端嘅終結。2017年，人類嘅勢頭唔錯。祝今年天下所有識做嘅人，有得做。
孫柏文
獨立股評人
http://www.fb.com/shuen
本欄逢周二刊出