元旦過後，轉會市場亦重開，奧斯卡杜斯山度士落實由車路士轉投中超上海上港後，周一早上就飛抵上海；呢位巴西中場亦好識做，大讚上海係美麗嘅城市，即晚仲去到上港嘅練習基地，同教練波亞斯會面，了解一下球隊運作。不過，唔知《法國足球》雜誌係咪有心贈慶，事關佢哋列出2016年最失望陣容，奧斯卡榜上有名，其他入圍者仲有曼聯中場費蘭尼同前鋒迪比、拜仁慕尼黑前鋒湯馬士梅拿等。