民陣元旦日舉行「主權在民」遊行，反人大釋法，守護立法會，仲為俾政府司法覆核資格嘅4名民主派議員籌款，應付龐大法律開支。雖然新上任嘅民陣召集人區諾軒直言參與人數只有9,150人唔理想，但計番每人平均捐款數目就唔少，未計民陣同人民力量嘅籌款箱，守護公義基金籌到142萬，平均每人捐咗155蚊，較去年7.1遊行人均捐18.6蚊多咗逾7倍呀！
元旦遊行有9,150人上街，唔少人聽到呢個數字都好奇，過往民陣報數都係齊頭，點解今次唔直接話有一萬人﹖區諾軒話計算方法冇變過，都係喺銅鑼灣同灣仔點人數再乘以1.5，當係中途加入而冇點算到嘅人流。原來今次佢哋內部都討論過好唔好報一萬，坦言民陣以往被批評報大數，最後決定寧願保守都唔發水，希望鼓勵更多人參與，順便表達「人唔夠，要多啲人」。
區諾軒話從捐款數字睇到人數以外嘅意義，見證大家着緊守護公義，反對政府用司法覆核否定立法會選舉結果。