潘頓與沈集成這個騎練組合，在元旦日賽事合作勝出「四季旺」，可說有個好開始。本周三（4日）快活谷夜賽，兩人獨有一匹第四場四班一哩的「領航大師」攜手出擊，當然有睇頭啦！
「領航大師」今日排位朝有晒搏殺手影，馬兒由潘頓在草地跳兩段，出試前後皆見沈集成在旁吼到實，緊張到不得了，明顯對牠的狀態進度非常關注，之後沈集成繼續捉住潘頓密斟好耐，研究搏殺大計，動態與「四季旺」贏馬前近乎一樣，反映「領航大師」今仗絕對係目標所在。
「領航大師」同潘頓最合拍，騎3次得2冠1季全上名，係唯一贏過這匹馬的騎師。上仗國際騎師錦標賽抽配韋達，硬淨程度不及潘頓，仍殺入亞軍，可見馬兒狀態勇銳，今仗回配潘頓排5檔好位，梗係上風馬啦！