2016年是出人意表的一年，英國脫歐、特朗普當選美國總統等大事告訴大家，世間上許多事情是無路捉。許多人預測特朗普會輸，他贏會拖累美股下滑，結果他贏了，美股再創高峯，輸的只是那些作預測的人。
在投資市場，不少人喜歡用技術分析，按歷史數據構成的點與線（圖表）去預測未來走勢。我不相信這些過去式的點與線能夠預知將來，事關影響股市或股票走勢的因素眾多，投資氣氛、資金流向、市場傳聞等等，近年還有大媽因素，內地資金好像無窮無盡，走極都有，來無影、去無蹤，影響力卻相當龐大。
望着恒生指數過去十年的走勢圖，有先升後跌，有先跌後升，根本沒有路數可言。要數的話，十年當中，有六年，升市於下半年發生，另外有三年，上半年處於高位後，下半年9月至10月急插，包括2008年金融海嘯那一年。
好鍾意一位分析員朋友所講：「泡沫，通常係爆咗先知道係泡沫」。廢話得來好有道理，老散身處升市當中，往往估計或主觀意願認為仲有得升，等到大跌市輸到褲穿洞，年尾看走勢圖才知一早見頂。
踏入2017年，坊間好多聲音估計今年又是股災年，皆因1987以及1997年均爆股災；2007年港股原本一遍歌舞昇平，年尾溫總殺停港股直通車，升市就拜拜；2017年危不危？風水師麥玲玲給我的投資建議，就是「有糊就食，唔好貪心」，你話呢？
高淑嫻
https://www.facebook.com/koc9nine