香港人到底鍾意食薯片抑或葡萄多啲呢？定還是飲奶先至係主流？八方就覺得食得多以上嘅嘢都好滯，不妨搵啲另類選擇。俾政府入稟DQ嘅社民連立法會議員梁國雄喺元旦遊行笑稱「再俾人逼兩逼，我真係出嚟選（特首）」後，一石激起千重浪，有民主派力推長毛出戰，以便狙擊建制派，包括香港眾志羅冠聰，佢話要將小圈子選舉變成荒誕劇。如果長毛入到閘，肯定好戲連場喎。
到底長毛講咗啲乜，令到粉絲熱血沸騰？查實佢係話自己睇得再多《三國演義》，都估唔到政府會DQ民選議員，聲言再俾人逼兩逼，佢會出嚟選特首，「我要親口問佢哋，根據何經何典去DQ議員？」
質疑選財爺係助紂為虐
佢其後仲撰文，質疑非建制派選委嘅造王策略，話如果投票支持財爺曾俊華，不單對公民運動冇幫助，更加係助紂為虐，因為曾俊華都係睇中共馬首是瞻，同其他參選人無異，揚言「造王不如參選直斥權貴，倡投白票，以示抗議，以小圈選舉，彰顯全面普選的力量」。
同樣俾政府DQ嘅羅冠聰，力撐長毛去選特首，唔係因為佢認同呢個小圈子制度，而係支持長毛入閘挑機，「喂阿哥」係長毛口頭禪，聰聰就喺facebook po咗篇〈喂阿哥，長毛選特首有無得諗？〉，話特首選戰肯肯定係嚟緊3個月嘅新聞焦點，詢問大家意見：「假如我哋有一位候選人立場堅定，能夠無間斷狙擊建制派，踢爆保皇黑幕，將呢個小圈子選舉變成一齣荒誕劇，大家又覺得點？」唔少網民都話撐，話長毛唔會賣港，「煩都煩死班建制派，搞寸個小圈子party都好」。
李八方
mailto:[email protected]