自由黨嘅陳浩濂Joseph拍住榮譽主席田北俊出戰商界一選委戰，青出於藍力壓田少成為票王！原來呢位商界一票王係華仁仔，當年主動要求負笈海外開眼界，估唔到打動埋當時女友、即係𠵱家嘅陳太一齊留學，而佢哋撻着竟然係因為拗！
自己安排美國留學
今年40歲嘅陳浩濂係獨仔，佢細個對唱歌、踢波、童軍、鋼琴等乜都like；由番禺會所華仁小學升到香港華仁，入咗學校足球隊同辯論隊，中六仲喺校內歌唱比賽攞過亞軍。
Joseph話高中時好想去海外升學，但屋企人唔多想，佢依然去考海外升學試兼報埋學校，「阿媽知道後都問我係咪嚟真？𠱁到臨尾同佢哋講，畢業後會返香港，（我）始終係香港仔」。
1995年暑假中六畢業後遠赴美國密西根大學讀經濟學同心理學雙學士，由於工程師爸爸當時係公務員，1999年返港後佢都想做公務員，點知撞啱經濟不景氣，「想考AO但政府唔請人」，結果加入金融界投身美林集團，2009年加入自由黨參與社會工作。
Joseph中六時喺校際辯論比賽仲識咗𠵱家嘅老婆，「呢段姻緣可以話係拗番嚟」，但佢中六畢業就去美國升學，異地戀竟然開花結果？「太太都想去外國讀書，我之後幫佢填晒表、報埋我間學校，一年後佢都過咗嚟同我一間大學，哈哈」。
