中軟國際（354）全天候IT瓣數，客戶同合作夥伴又係超級大孖沙，明年得11倍預測PE，近磅行家當中，中軟至抵搞，煲中軟博翻半番，真係唔過太。
中軟係內地最早期軟件商之一，家陣客戶包括阿里巴巴、華為、騰訊（700）、微軟同GE。又據IDC報告，中軟喺中國離岸外包整體市場排前三位、歐美市場排前兩位。集團啱啱公佈無耐，獲首批全國訊息系統集成及服務大型一級企業資質。而據諮詢機構預測，到2020年，內地IT市場規模，會達6萬億元人仔。中軟掂晒！
場內專業預測，中軟今、明兩年EPS 0.26港元同0.317港元，現價3.64元，明年預測PE 14倍同11.5倍。同樣專業預估，中軟今、明兩年PB 1.7倍同1.46倍。場內近磅行家金蝶（268）今、明兩年預測PE 26倍同21倍；明年預估PB 1.75倍、聯絡互動（深002280）38.8倍同24倍；明年預估PB 14倍、千萬科技（深002373）34倍同27.6倍PE；明年預估PB 3.2倍，中軟明年預測PE同PB，平咗一半！仲未計，中軟有分拆單一瓣數上市潛質，一通過資本化反映價值，中軟實際PB仲低！
中軟家陣總市值得80億元多少少，上邊深圳上市千萬科技，市值折約179億港元，聯絡互動357.6億港元，分別係中軟市值2.2倍同4.5倍！深港通開波，中軟係其中可買賣一員，呢個區區市值，對於北水嚟講，算乜？
煲中軟，當現價翻半番到5.46元計，明年預測17.3倍PE，仲未追到最近磅嘅中軟，比起上邊兩隻深圳上市IT股預測PE，仍然平咗27%。
錢雋
細價股專家
本欄逢周二刊出