近年香港體育界唔少年輕猛將登場，好似23歲嘅香港壁球代表隊成員葉梓豐，7歲開始學壁球嘅佢幾個月前出戰世界大學壁球錦標賽喺男單賽奪冠，係香港首位攞到呢個獎項嘅球手；今年22歲、9歲開始接觸壁球嘅隊友黃祉謙則攞到銅牌。
呢兩位壁球小將原來自小就認識，讀中學時加入咗香港體育學院青年軍，開始運動員生涯，其後透過學生運動員入學計劃入讀城大，仲一齊讀工商管理學士課程。為咗方便訓練，佢哋入住體院宿舍，成為室友，訓練同上堂都一齊，難怪一直互相扶持。
而喺啱啱結束嘅世大男單賽事中，佢哋仲喺準決賽對壘，葉梓豐勝出晉級，最終仲為香港奪得呢項賽事第一金。葉梓豐接受政府新聞網訪問時話對於摘金又驚又喜，「直至打完最後一球，贏了，我才慢慢反應過來」；奪銅嘅黃祉謙就話輸畀隊友唔算太難受，最重要全力以赴。
香港壁球總會總教練蔡玉坤話兩位小將都係大學生，證明運動員可以文武兼備，亦證明亞洲人體格適合打壁球。