民建聯主席李慧琼早前接受民主黨劉慧卿網台節目訪問時，突然大爆特首夫人梁唐青儀同囡囡齊昕關係唔好係人都知，又指齊昕病情差等，惹嚟梁太高調反擊，批評佢言論武斷，令人遺憾喎。原來齊昕嘅母親開炮嗰時琼子唔喺香港，八方噚日喺民建聯25周年會慶見到琼子，趁機關心吓佢同梁太冰釋前嫌未。
琼子話就呢件事冇補充，但好開心見到齊昕身體好，希望佢可以早日康復。咁有冇聯絡齊昕嘅母親解釋？琼子就笑言未有機會見到對方，但話有同特首反映，相信係佢誤會咗喎。
其實齊昕嘅母親唔係第一次因為家事公開發炮，喺2014年政治學者蔡子強撰文寫梁振英安排齊昕同梁太喺英國海德公園合照一事，梁太就公開批評蔡子強「冷血、刻毒」。
另外提到特首選戰，琼子就話黨中委未討論特首選舉中會否提名參選人，但認為唔提名非理想做法，強調冇禁止黨員為參選人站台喎。