元旦日沙田日賽上半場仍未完結，前冠軍騎師潘頓已整咗一口1檔馬孖寶，第三場贏李易達馬房1檔「永高」後，第四場四班1600米策大摩馬房1檔之「美麗寶寶」勝出，潘頓就此包辦第三口孖寶，個人率先起孖在騎師王透出。「美麗寶寶」單Win及組合獨贏A1均派21.5元。
四歲馬「美麗寶寶」出自應屆本地拍賣會，馬主顧名思義同人強馬壯的「美麗」系有關，就係莎莎老闆郭少明女兒郭詩雅擁有。此駒身價600萬港元，拍住出爐新馬錦標冠軍「巴基之星」，本身對上兩仗出擊都跑位置贏唔到。
今次「美麗寶寶」抽到1檔起步零舍唔同，潘頓沿用第三場贏同一檔位馬「永高」的方式，沿途留守內叠四五位好整以暇，入正直路借勢望空後一發力，人馬攜手掟甩晒所有對手，就此直奔終點贏個多馬位，「美麗寶寶」跑到第七仗卒之開齋。
連同「美麗皇牌」及「美麗鉅星」分別兩捷及一捷，以及「美麗大師」早前連勝馬會一哩錦標及香港一哩錦標，加埋今次「美麗寶寶」開齋幫馬主打響新一年頭炮，整個「美麗」系陣營季內已六度勝出頭馬，可謂旺氣迫人。
第四場二至四名順序為「凱旋星光」、「奔馳寶馬」及「開心健康」，呢條熱門四重彩只派1,744元。