八方經過非正式以及唔科學嘅統計後發現，政客嘅賀年post可以量化佢哋嘅支持度，好似辭職逾廿日考慮參選特首、但仲未獲中央批准嘅財政司司長曾俊華，同一早已經宣佈參選嘅新民黨主席葉劉淑儀，噚日都喺facebook同廣大市民祝賀踏入2017年，但兩人得到嘅like同嬲嬲數目就差好遠喇！
薯片叔叔用英文簡短留言，指希望新一年為香港帶來希望、信任及團結，祝大家新年快樂。半日已有過5,000個like，嬲嬲就得1個，唔少網民留言希望薯片叔叔新一年可以變特首，有人仲稱呼佢做「曾特首」，希望佢「新年快上，上位個上」！
雖然一踏入1月1日就發帖嘅葉劉搶佔先機，但讚好嘅截昨晚為止得1,300個，而嬲嬲就有30個。葉劉話過去一年香港有好多大事發生，民生、經濟、政制發展等都似乎未搵到出路，希望各界可以放下成見，為香港開拓新前景。佢又話去年最開心係高票連任立法會議員，令佢下定決心為香港付出更大努力，希望大家喺特首選舉繼續撐佢喎。