話咁快2016年就過去咗，唔少媒體都搞吓回顧，學友社噚日都公佈咗2016年中學生十大新聞選舉，估唔到「侵侵」特朗普當選，會係6萬幾個中學生嘅年度新聞首位！搞手之一、中四學生陳俊熹話，網絡同傳統媒體日播夜播侵侵，學生又點會留意唔到？佢仲話十大新聞仲有英國脫歐同寨卡病毒，反映學生有國際視野。
陳同學話中學生最關心單新聞夠唔夠貼身，所以三星Note 7爆炸、中學生自殺、Pokémon Go大熱都排好前，分別喺第二、第四同第六位；至於銅鑼灣書店事件就排第三，睇嚟唔只成年人好關注，中學生都對一國兩制好擔憂喎。