元旦雷神幾乎嚇壞人！獲封神級騎師的莫雷拉這天跑完前七場，罕有地一場位置都冇拎過，在騎師王獲零分，俾當時揸住三Win以36分領先的潘頓拋離一條街，搞到騎師王買雷神的粉絲要搣飛咁滯！
不過雷神即係雷神，佢即使剛啱於泰國度完假返嚟，連續幾朝冇操馬，但跑到這天第八場三級賽1400米華商會盃，就馬上醒神起嚟。今場雷神騎住姚本輝馬房大熱門綠魔「有得威」沿途留住跑包尾，到拉士抄出外叠一衝過晒贏近兩馬位，馬兒無驚無險連捷，雷神創個人新高再破紀錄，連勝28次香港賽事，在騎師榜上繼續遙遙領前。
至於「有得威」首次奪得分級賽冠軍，一連兩場配雷神全勝於1400米，人馬合作保持不敗，單Win及組合獨贏3揀1開A1，分別派26.5及14.5元，而呢場大賽有開售勝出練馬師（組合獨贏），結果由B3組合獲勝並派16.5元。
本屆華商會盃七駒列陣現冷場，四重彩派3,408元算不錯，事關冷馬「飛來猛」跑第二，大熱門「壯思飛」由潘頓跑第三，半冷門「詠彩繽紛」獲殿軍。令人意外是綽號太陽神的「首飾太陽」大敗包尾。