2016年過去，港人經歷超級寒潮，領教過女傑青及港媽的偉論、建制派及權貴的「神邏輯」，聽到打工仔的無奈、青年人絕望之聲，期盼英雄挺身而出，帶來希望，一字一句，要記得的始終都會記得。
十大Sound Bite(排名不分先後左右忠奸)
1.)港女上大帽山睇結冰被阻，大鬧警察，「條命係我自己架嘛！救人係你哋嘅職責」。
2.)女傑青黃仰芳大談買樓「成功之道」，「從來唔會同我啲同事去hea，我同啲同事嘅感情係普通嘅啫，我唔得閒同佢哋social(交際)」。
3.)怪獸家長認為子女前途取決於「贏在射精前」，BB一月出生做「大B」最著數。
4.)被DQ青政立會議員游蕙禎講土地問題，拋出「扑野論」。
5.)前立會議員吳亮星亂噏「洗頭艇」論點評銅鑼灣書店事件，「五條書局友被傳坐洗頭艇偷渡回內地宿娼嫖妓」。
6.)港大校委會主席李國章批評衝擊校委會會議的學生「好似吸咗毒、被操控」。
7.)特首梁振英回應行李事件，「我只不過同航空公司職員講，我是乘客梁頌昕個爸爸……我不會叫自己梁特首」。
8.)財政司司長曾俊華回應與梁特不和之說，「You always agree with your boss(你永遠都同意你的上司)」。
9.)本民前梁天琦被禁參選，斥香港已成為人治社會，「當獨裁成為事實嘅時候，革命就係我哋嘅義務」。
10.)銅鑼灣書店店長林榮基勇敢爆料，「我希望香港人向強權說不，我都可以，點解你唔可以？」
「金句」太多，未能盡錄，滄海遺珠當然包括建制派立會議員令人嘩然的發言，民建聯蔣麗芸開會叫人要「望住我講嘢」、用神主牌比喻五星旗；「西環新契仔」何君堯支持警察應在旺角騷亂時開槍，「唔係殺市民，係殺暴徒」，令人嘩然；多名出選立會的人士受到死亡恐嚇，朱凱廸一家人受警方24小時保護，嘆有家歸不得，「居然係因為我嘅政見受到死亡威脅，我哋法治可以話蕩然無存」，而周永勤亦宣佈受壓棄選，「我唔想講，我唔擔心我自己，我只係擔心身邊嘅人」。