去年第四季港股由24300點水平陰乾至21500點水平，幾乎所有板塊都要調整，但〈投資導航〉上季專家揀股卻有驚喜，包括唐牛推介的天寶（1979）及魏力推介的丘鈦（1478），季內均一度升約六成；晉佳的上海集優（2345）及錢雋的太網（543）亦曾有可觀回報。2017年伊始，各專家冀再下一城，推六大精選股助大家新年有個好開始，年頭贏到年尾。
唐牛 合豐憧憬派特息
上季推介天寶（1979）曾較買入價高三成，超標完成。今季推介合豐集團（2320）。
合豐主要產銷箱板紙及瓦楞包裝，在產能過剩問題改善下，平均售價提升，中期盈利激增1.4倍至2,529萬銀，毛利率亦升逾一個百分點至20.5%。另一賣點︰合豐上周剛宣佈2014年出售鳳崗廠房的交易終於完成，資產負債表有2.3億銀應收賬，嚟緊全年業績可收回，連同原來1.9億茄殊，手頭現金超過4億銀，會否順勢派特別息？值得期待。
合豐手頭仍有五個廠房在手，早前賣一間賺4億銀，再賣誘因有幾大，計數機都計唔到。大股東亦頻頻掃貨，平均作價0.841至0.935元，大寶藏當前，梗係先掃為敬。現價買入，目標價1.2元，0.8元止蝕。
晉佳 通達跌過龍值博
通達（698）去年11月升至2.45元見頂後，短短13個交易日跌幅達25%。不過，通達手執華為、Oppo、紅米等手機品牌定單，雖然規模及市場地位沒有瑞聲（2018）及舜宇（2382）般強大，仍屬優質手機設備股。該公司2016年首三季收入增長25%，其中第三季增幅達49%，預期全年業績亮麗，券商平均預測2016年市盈率12倍，估值吸引。
大股東王亞南去年12月13日至16日，一連四日增持，成功撐住股價，之後連日錄得陽燭，回穩迹象明顯，今年第一季回升機會大。
騰訊（700）年底前反彈，主因跌過龍，預期資金於欠缺炒作主題下，會轉向留意近期跌得多、基本因素不俗股份，通達有條件反彈。2元以下吸納，上望2.3元，跌破1.8元止蝕。
千頌C 金隅有重組光環
阿爺不斷強調新一年，一字記之曰「穩」，「穩」呀嘛，即係冇新嘢發圍，全副心機去做未搞掂嘅嘢，相信2017年去庫存、供給側改革呢類老調會繼續彈；另一方面，要令經濟繼續有增長，咪又係玩固定資產投資。如是者，水泥股絕對係受惠股，今次推介金隅（2009）。
加強供給側改革之下，水泥價格料持續回升。另外，金隅近日公佈同華潤水泥（1313）合作，意味行業改革的確積極進行中，金隅會繼續被重組概念光環照住。同時，金隅去年中已開始與冀東水泥合併，完成後就成為中國第三、世界第五大的水泥企業。第三季一向係傳統淡季，但金隅去年期內純利按年大幅增長至4.49億元人民幣，升幅達31倍，相信重組帶來嘅協同效應將進一步展現。
魏力 粵豐處高增長期
港股上月弱過藥煲，能在如此市況逆流而上的股份，今季可睇高一線，粵豐環保（1381）為其一。粵豐為廣東省最大垃圾焚燒發電企業，目前處高增長期，上半年總收入升38%至6.7億元，純利飆53%至1.5億元。大陸霧霾情況嚴重，有利環保股獲政策扶持，上半年粵豐無害化處理垃圾110萬噸，綠色能源發電量4.45億千瓦時，減排二氧化碳48萬噸。近期成交亦見異動，去年12月中低位現大手成交，之後就逆市開車。
翻查CCASS，滙豐持倉減約27球，海通增加25球，或為大炒前奏。粵豐貨源亦歸邊，至去年12月23日，首10大券商持股96%，加上為新增港股通股份，受惠北水南下。3.75元買入，目標4.8元，失守3.5元止蝕。
高明 新晉日圓概念股
北海道雪災，不少港人大鬧安排失當，反證明港人愛遊日，加上特朗普當選後，日圓跌逾一成。要選日圓貶值概念股，首選I.T（999）。
公司去年10月發盈喜宣佈虧轉盈，隨後公佈的中期業績顯示，日本業務佔總營業額增至近一成。當中五年前以逾2,000萬元收購的服裝品牌「猿人」A Bathing Ape步入收成期，業績暗示「猿人」買家主要為遊日旅客，情況有如中國人來港開藥房賣奶粉予中國人。
更重要是「猿人」對於潮人屬剛性需求，I.T日本業務毛利率高達71.6%，一件Tee印「猿人」公仔動輒賣6,800日圓（453港元），日圓貶值更提供遊日掃貨藉口。管理層睇淡香港消費前景，估計會集中資源發展日本，帶動生意翻生。
錢雋 江銅PB平盡同業
江銅（358）呢期跟個市插，作為全球同級數當中PB最平嘅銅股，有得諗。
以江銅現價10.82元計，比起本身A股（滬600362）大折讓近48%。場內專業預估，今明兩年PB 0.69倍同0.63倍，全球至大銅礦商自由港麥克莫蘭，明年預估PB係兩倍樓上，又Antofagasta同Aurubis預估PB，亦近1倍，江銅平霸！
睇番去年11月，中國國家能源局數據全國用電量5,072億度，比去年同期增7%，同月中國PMI錄51.7兩年高，反映內地製造業回暖，對銅價有支持。江銅現時同六年低位唔係差好遠，加埋日線圖RSI超賣，有唔錯值博率，睇定10蚊兜轉，當上番13蚊計，潛在回報率30%，到時PB都係0.76倍。
