一年容易過，2016年眨吓眼就成為歷史，今日係2017年嘅元旦日，謹祝各位讀者新年新願望全不落空，要健康得健康，要發財可發財。
年輕時，覺得時間過得好慢，20年就係一生一世。1977年之時，左丁山年青力壯，自覺前途無限，因負責研究部兩年，曾屢次被美國上司詢問：「1997問題會點樣解決？」嗰陣時往往一笑置之：「唔駛煩，還有20年，幾時先到呀，實冇事嘅。」1977到1997，似乎真係過好耐都未到，其間左丁山換咗八次老闆，做過八間公司，最後自己成為「自由職業顧問」，20年過得好刺激。點知由97到2017，同樣係20年，話咁快就過咗，寫「GG細語」寫咗20年，職業、生活、朋友與1997年之前比較，幾乎未變過。古語有云，少壯不努力，老大徒傷悲，以前當呢句古語係廢話，今日先至真正領略其中奧妙，可惜為時已晚。
人生頂多只有三個20年可以全力工作（邵逸夫、李嘉誠、畢菲特係特殊例外），1997至2017呢20年，左丁山之流係浪費晒，同一時間，就見到馬雲、馬化騰以及大量中國富豪崛起，香港就未見到有新李嘉誠、新潘迪生、新邢李㷧、新黎智英、新王家衛、新周潤發、新張學友、新董啟章、新謝清海、新任志剛或新陳德霖、新鄭海泉、新劉兆佳出現，香港究竟發生了甚麼事？1997之後，難道香港已進入了一個停滯期（stagnant period），只係得樓價不斷有突破？
20年來進步最快嘅，當然係科網技術。1995年莫乃光在于品海吳崇文支持下，在明報工業大廈建立香港第一個互聯網站（HK Net），左丁山去參觀，聽極都唔明，唔知莫乃光講乜。1997年，行街鄭帶廣州商人到左丁山公司介紹互聯網，廣州商人認為不可思議。一陣旋風過後，中國已成為互聯網大國，香港瞠乎其後，雖然人人有一至兩部手機與平板電腦，但本港並未出現過一位科網大亨能在世界上受重視，希望在不久將來會有啦。
回歸20年，香港與其他亞洲地區相比，各方面發展都比人地追上或追過（特別係南韓，但南韓模式正陷入危機），可能係20年來大家多咗搞政治之故。基本法下之政制，有先天性缺陷，注定行政立法兩者不會和諧，功能組別與比例代表制令立法工作慢如蝸牛上樹，但我地普通市民唔理會、唔關心政治亦唔得，因為重權謀輕民主之人執政，逐漸窒息民主自由，實行溫水煮蛙，煮熟香港；如果批評香港進步慢，依然故我嘅話，歸咎於政治，唔會錯得去邊。