澳職墨爾本城近排認真頹，喺上周六聯賽又失分，作客下游嘅中岸水手都贏唔到，有啲運仔以2:2逼和對手，連續第五場澳職贏唔到。對住排尾二嘅水手，墨城攻勢都係唔多，不過喺上半場都靠老將卡希爾先開紀錄。卡希爾一向鍾意入波後向角球旗打拳慶祝，不過今次水手球僮玩嘢，早就拎起支角球旗（圖），搞到卡希爾冇得打。易邊後水手靠反擊製造唔少威脅，到比賽末段終於有收穫，由布夏基亞同奧當路雲各入一球反超前，之後再有一次補射黃金機會可惜奧當路雲把握唔到，轉頭仲具爭議性咁輸球12碼，史葛加路維鏟波在先，但球證都係判極刑，墨城由科拿路利操刀入網扳平，好彩執番一分。