上周六大除夕，香港球迷就可能出街倒數睇煙花，其實英國都有連場大戰，除咗七場英超，蘇超都有傳統打吡兼榜首大戰格拉斯哥流浪迎些路迪一樣放晒煙花；些路迪領隊羅渣士首次領軍作客格流，結果都可以2:1反勝，聯賽連勝15場。
開季至今未輸過
些路迪賽前係威係勢，聯賽開季仲未輸過兼連勝14場，加上蘇聯盃準決賽1:0淘汰格流，今季已經兩勝呢支傳統對手，不過今場作客艾博斯球場，係羅渣士首次領軍作客格流。格流曾因財政問題一度降至蘇丙，好彩慢慢爬番上嚟，今季重返蘇超再度挑戰些路迪。雖然論陣容及唔上客隊，好彩格流仲有班老黃忠支持，12分鐘先開紀錄嘅係堅尼米拿。無錯，就係當年搞到大哥瑜講「足金X猴」嘅堅尼米拿，其實佢都已經37歲，當然𠵱家唔係踢緊狼隊，2014年已經返家鄉協助格流升班。
贏波後拉開19分優勢
不過些路迪始終實力勝一籌，上半場先靠穆沙迪比利追平，換邊後雖然呢位法國前鋒連番失機，好彩隊友生性，前曼城翼鋒史葛冼佳亞喺70分鐘建功，幫些路迪反勝2:1，聯賽15連勝，計埋盃賽今季三殺格流，20戰錄得19勝一和嘅佳績，拋離次席嘅格流多達19分。除非下半季嚴重失準，否則羅渣士幫些路迪蘇超六連霸都冇走雞。