明年3月26日，就會知道邊個做新特首；冇咗689，市民係咪會有氣唞？相信都好視乎新局長人選，係咪個個吳克儉咁款！其實呢屆當選冇耐嘅立法會新丁議員中有唔少奇人異士，對香港各種問題都有獨特見解，例如由扑嘢解構土地不足，游蕙禎嘅高見相當矚目；逗號鄺體吸引粉絲狂畀like，鄺俊宇掌教育都當之無愧。周浩鼎嘅喊鼎鼎神功，揸fit勞福局一定好煞食，慘過貧苦大眾，以淚將受眾打動……相信由佢哋組成新班子，施政或者會更easy！
【勞福局】喊鼎鼎博同情
老實講，八方覺得現任勞福局局長張建宗做得唔錯，睇佢不時喺受訪時背出各款政府熱線號碼，八方打從心底感受到嗰份誠意同真摯。但舊嘅唔去、新嘅唔嚟，新任局長應由周浩鼎接棒。周浩鼎又名喊鼎鼎，回帶至今年初新東補選，佢只係為咗想大家坐低一齊傾就講到喊，畀佢搞標準工時點會唔掂？一隻手拉住勞工界、一隻手拖實商界，聲淚俱下叫勞資雙方好好傾，試問工聯會理事長吳秋北點好意思離場呢？但標時真係好難有共識喎，萬一傾唔成點算？唔緊要，喊鼎鼎會照樣出嚟講跟進咗，好似東涌戲院咁，總之話跟進咗就得，如果市民鬧，或者可以再用眼淚攻勢博同情。
【財庫局】容姨收走私稅
今屆立法會建制新星，點少得新西環契女、新民黨容海恩。如果佢要做官，八方覺得最適合係掌管財經事務及庫務局喇，雖然佢由參選到當選都有唔少令人印象深刻嘅言行及表現，但要數一鳴驚人嘅相信係出席選舉論壇時，人民力量陳志全問佢點睇增設陸路離境稅解決水貨客問題，佢嘅回應突破盲腸：「咁飛嗰啲呢？陸路呀？淨係陸路呀？咁飛嗰啲你又唔控制嘞喎？」嗱嗱嗱，對於徵稅有咁全面同多元嘅研究，由陸路講到飛，可謂別具心思，若然佢做財庫局局長，相信會有開源新方向。
【創科局】聰聰電競脫毒
羅冠聰係香港史上最年輕代議士，佢之前仲有個朵叫電競聰，事關打機係佢本來嘅發展方向。八方唔會無知到以為打機就係創科，重點係聰聰唔使見過Steve Jobs，只以喺打機培養出嘅理解力、邏輯力、手眼協調、靈敏反應，已經符合以局長身份發展創科嘅所需條件啦！打機向來仲畀人毒嘅感覺，但聰聰連議員都選到，試問毒得去邊？連唯一缺點都克服埋，簡直係創科局局長嘅最佳人選。參選特首嘅又好、唔參選嘅又好，連唔連任嗰個，一日到黑都話創科重要，但講真佢哋識條鐵咩？所以下任一於搵香港眾志羅冠聰做啦！
【教育局】鄺神文舞兼備
八方，正式宣佈，下任，教育局局長人選，係，民主黨，鄺俊宇。香港不時被譏為文化沙漠，多得鄺神降臨，賜予港人鄺體，為咗紀念佢嘅神蹟，一於由佢做教育局局長啦！衡工量值，現任局長吳克儉有名你叫唔得掂，基本上冇乜人可以做得差過佢。但八方唔係想暗踩鄺神，而係諗深一層，佢啲書賣得咁掂，相信由佢制訂嘅課程大綱、課程內容，都可以吸引女學生瘋狂溫習，而男學生為咗討好女神亦會跟住做，咁學生成績自然提升。仲有，鄺神另一身份係Breakdance高手，完全起到讀書之餘年輕人亦要有適量運動嘅示範作用。
【運房局】游BB關注住屋
要解決房屋問題，一定要對房屋短缺有深刻、貼地嘅理解，先可以做到急市民所急。講到呢度，最合適做下屆運輸及房屋局局長嘅莫過於青年新政游蕙禎。游BB一句：「香港好多好嚴峻問題……就算我哋𠵱家想去扑嘢（做愛），都搵唔到房扑呀。」道盡年輕人生活空間幾咁少，生活幾咁壓抑。早前雅虎香港公佈2016年Yahoo全年搜尋人氣榜結果，游BB扑嘢論勇奪熱搜神級理論第1名，單係呢份感染力同傳播訊息嘅能力，相信現任局長真係望塵莫及。
【政制局】泰博了解國情
𠵱家唔少高官都係港英年代做起，嗰顆中國心都係回歸之後焗出嚟，對國情未必好了解，而做得政制及內地事務局局長，成日要同內地打交道，推政改又要有符合中國特色，對「偉大祖國」認識少啲都做唔嚟，但八方相信熱血公民鄭松泰可能勝任。泰博曾經喺北大攻讀社會學系碩士同博士課程，當年仲接受港台訪問反思香港人身份認同，話流緊中國人嘅血但連國歌都唔識唱云云；上任議員後，又喺議事堂將國旗倒插，呢個行為可能反映佢經過多年思考及學習後，對中國有更深刻了解，或者核心內圍覺得咁樣更愛國。
李八方
mailto:[email protected]