意甲阿特蘭大今季成績遠超預期，除咗陣中一班土炮後生仔演出良好之外，阿根廷前鋒艾真度高美斯（小圖）都有好表現，不過最近佢同囝囝趁歇冬去咗杜拜玩，就惹嚟非議。話說佢同得四歲嘅囝囝巴迪斯達喺沙灘踢波，唔知係失足定認真得滯，竟然跳起雙腳飛鏟搶波，搞到阿仔撻埋落地（圖）。呢個衰老竇仲將段片放上網，畀着喺正式比賽，高美斯你紅牌都有得拎。