電視劇嘅影響,真係會好深遠,好似政制及內地事務局副局長陳岳鵬咁吖,佢同八方回憶年少時因為愛睇美劇《仁心仁術》,一度想讀醫,再大個啲喺美國讀寄宿學校時,先發現世界可以再睇闊啲,最後喺史丹福先後完成公共政策文學士同政治及比較社會學碩士。
而陳岳鵬最令人關注嘅,當然係佢喺葉劉淑儀跑道上起機,返港後拍住葉劉創立匯賢智庫,由議員做到特首辦特別助理,再時至今日嘅副局長。佢自爆由細到大都好守紀律,唔知同佢參加童軍有冇關?不得不提嘅係喺英華中學讀書時,佢會考7A,包括英文,唔怪之得葉劉睇中佢啦!
意「相」不到的收穫:普通人唔會隨便見報成為主角,所以當陳岳鵬嘅女親戚見到同佢哋嘅兒時合照(圖)刊登咗,開心到震,仲笑笑口話,「真係出咗我嘅露底相呀」,陳岳鵬估唔到會令親戚咁驚喜。