元旦日於沙田草地上舉行11場賽馬，並採用B加2跑道。睇番上季元旦日亦都係用B加2欄作賽，當日早段場次大利前置馬，頭五場賽事皆由守前三位入直路馬匹建功。
不過當天去到後段形勢卻大逆轉，頭馬「春意溢然」、「太陽喜喜」、「萬事勇」、「勢必跑」及「當代沙皇」全部從尾叠後上反先對手勝出，所以臨場大家一定要執生。
今戰列陣馬中，頭場出戰五班2000米的「大寶庫」跑B加2欄一次即入Q，上仗跑四班2200米都可以放得有聲有色。今次其練馬師葉楚航配上新開齋騎師巴度，並重回五班作戰，加上預期早段場次利放，當然有力帶到。
另外，練馬師蘇保羅安排愛將潘頓策騎「活力小駒」角逐尾場二班1200米。此駒近三次跑B加2欄全勝，包括前仗於同程獲勝，重返強項可望回復好表現。