成日話左手伸一伸，貴過你全身，一班英超主帥當然仲誇張，佢哋帶隊比賽，個個都戴住十幾廿萬上身！當然唔係講緊袋現金啦，而係講緊佢哋手上戴緊嗰隻錶，郁啲都多過你同我成年份糧。英國傳媒發現，原來般尼領隊戴治最豪，平時比賽都戴住隻40幾萬港紙嘅Patek Philippe。
哥帥摩佬有free lunch
英國《每日郵報》做咗個專題，搵番20支英超球隊領隊啲相，睇吓佢哋平時戴咩錶去記者會同教波。哥迪奧拿同摩連奴雖然人工高，但原來佢哋隻錶唔係最貴，最貴嘅係般尼教頭戴治嗰隻PP 5990/1A，真係深藏不露！呢隻錶價值4.5萬鎊，大概43萬港紙。排第二嘅係戴慣「勞」嘅愛華頓領隊朗奴高文，佢隻撈喺2012年出，價值34萬港元；而車仔領隊干地亦係愛「勞」之人。
波可以輸，但行頭唔可以輸！雖然新特蘭今季持續低迷，排名都喺最尾三位上上落落，但領隊莫耶斯隻錶都唔少嘢，價值排英超領隊第三位。莫耶斯呢隻都係名牌PP出品，值近30萬港紙。排英超錶王榜第四嘅唔係雲格，而係啱啱上任水晶宮領隊嘅「大儍」艾拿迪斯。佢財來自有方，畀英格蘭炒魷都有錢賠，當然有隻名錶跟身，佢隻Hublot值26萬。
數到去第五位，先到曼聯領隊摩連奴隻2014年世盃版Hublot，價值24萬港元。不過，我求大俠估計摩佬唔單止唔使錢買，仲有錢收㖭。睇番前年啲報道，當Hublot推出呢款錶嗰陣，就搵咗比利、納比、史高拉利同摩佬等重量級人馬宣傳。至於曼城領隊哥迪奧拿嗰隻，我諗都係唔使錢嘅，佢隻錶係Cimier幫曼城出嘅限量版，全球得1,880隻，食番曼城喺1880年成立。曼城咁有錢，隻錶都係值1.8萬港紙，唔通會收哥帥錢咁小家咩！
巴特利電子錶400有找
大家會唔會好奇邊個隻錶最平？我開估啦，係啱啱食無情雞嘅前史雲斯領隊巴特利。普遍英超領隊隻錶都幾廿個上落，但巴特利嗰隻T牌電子錶值40鎊，大概380蚊港紙，話唔定你嗰隻都貴過佢。
