社會越爛，越令人懷念那些年。八方今年開設新欄目「八方相當年」，搵嚟各界人士提供舊照，分享那些年。民主黨立法會議員林卓廷對老婆嘅愛的宣言、香港總商會首位女總裁袁莎妮嘅超清純學生look、股評人胡孟青嘅冬菇頭、前主播張寶華原來好遲拍拖、港視主席王維基扮嘅小矮人，以至副局陳岳鵬煲劇煲到想讀醫，相信大家記憶猶新，估唔到舊相舊事見報後，都令佢哋各自有意「相」不到嘅收穫喎！
林卓廷轉載報道冧老婆
今屆立法會有位廉署先鋒、同時亦係一位長人，皆因林卓廷身高6呎4吋，好難唔俾人望得見。成為立法會新丁嘅佢，「政途」查實一波幾折，佢自爆99年中大政治及行政系畢業後，其實想做記者，但不得其門而入，最後就做咗議員助理，點知由此同民主黨結下不解緣。
而呢條從政路，太太都一度反對㗎。唔知係咪因為兩人中學已經相識（圖），比較了解對方個性，尤其知道阿廷包拗頸，最終太太都肯開綠燈，畀阿廷由廉署「重返」民主黨做總幹事，令到新一屆議會有個「高」人一等嘅議員。
意「相」不到的收穫：如何回憶那些年，阿廷最想多謝當然係太太嘅默默支持，佢喺facebook轉載報道，冧爆留言：「阿廷只得一句話：多謝老婆Winnie多年默默支持，辛苦了！」嗱嗱嗱，相信林太嘅收穫，比阿廷更多喎。
李八方
mailto:[email protected]