陳寶珠噚日喺中環出席新書《青春的一抹彩色 影迷公主陳寶珠》記者會，獲七公主馮素波同沈芝華，以及近百名粉絲到場支持。套書共有三冊，最吸引係有唔少珍貴相片，由寶珠姐6歲登台到𠵱家共200張，唔少係佢嘅珍藏，第一次刊登，當中有一張寶珠姐着泳衣嘅相，佢話係自己無聊影。
預祝生日
寶珠姐說：「張相未出過街，嗰時天經（兒子）返咗學，喺屋企冇嘢做影相留念。」
後日係寶珠姐70歲生日，所以大會安排咗個大蛋糕預祝。講到今次出書係好朋友汪曼玲拉攏，又多得好多fans提供番一啲舊相，寶珠姐話：「睇番啲相可以話係百感交集，回顧一生行過好多路，有歡樂有唔歡樂，明白人有順逆境，好多謝身邊朋友畀到正能量我。」又透露今次賣書收益，會全數捐去血癌基金。至於另一冊名為《玉女沒有秘密》嘅書，就搵咗寶珠姐一班好友做訪問。
撰文：馮仁昭