前主播張寶華Sharon（圖）竟然係恐龍？唔係八方亂噏，係當事人自我形容嚟㗎咋，因為Sharon同八方「相」當年之時，自爆out爆往事，就係一直緊守中學生不應該談戀愛呢條「底線」，又確實似史前動物嘅！
Sharon細個到大一樣眼仔睩睩，就讀筲箕灣聖馬可中學時專心溫書，卻只愛留家而唔蒲自修室，無畀少男一絲機會，但依舊有鄰校男生等佢放學，真係恨死隔籬。而相信大家估唔到，佢話拍拖次數唔多喎，因為佢唔係好容易鍾意人。如果要打動呢位盛女芳心，似乎都要加倍神心。
意「相」不到的收穫：Sharon話呢篇報道出街後，身邊群情洶湧，「啲人都話呀，唔信我相信中學生唔應該談戀愛喎」，Sharon講完哈哈笑：「佢哋覺得我係拍拖拍到癲嗰隻喎。」有時現實係同幻想好有距離，八方都明嘅！