潮流興懷舊，聖誕前WhatsApp幾個群組不斷互傳幾十年前嘅聖誕大餐餐單，譬如有一間位於彌敦道485號，電話63610嘅銀宮餐廳聖誕大餐：
（一）什果咯嗲，（二）燕窩雞茸湯，（三）石班吉列，（四）燒火雞、火腿，（五）焗意粉區加甸，（六）聖誕布甸，（七）合時生果，（八）咖啡或茶。由聖誕前夕六時起至廿五日全日供應，每客五元。
一眾校友朋友看了，紛紛追查年份，最後有人指出係1960年左右，當大家還是小孩子的時候。再問：有冇人食過呀？一個都冇，相信最主要原因係大家屋企都窮，根本冇資格食。1961年嘅五元，係甚麼概念，一時諗唔清，只記得1967年中文大學學費係每個月80大元，好多同學要兼職補習先至搵到學費，在新亞canteen吃一碟牛河好似係七毫子。以學費比例推算，今天之大學學費係每年42500元，以12個月計，每月係3542元，16分之一就係221元，如果今日有上述聖誕大餐賣221元，相信必定吸引顧客在門口大排長龍，但不可不知，大學學費已有20年冇加過咯。
建築邦在聖誕日行經史丹利街太平館，特登望吓有冇聖誕大餐，果然有噃，拍低餐單如下：（一）燒火雞火腿、伴濃肉汁配沙律，（二）南瓜燕窩雞茸湯或周打魚湯，（三）招牌瑞士雞翼（2隻）或岑味牛脷或香煎蟹餅配千島汁，（四）主菜任揀一款，燒乳鴿448元；䱽魚拼石班478元；安格斯肉眼扒468元。（五）甜品，（六）橙汁或茶或即磨咖啡
太平館的聖誕大餐（以468元計）與平時該館的餐價計，算是克己，468元是5元的93.6倍，以食物價計算通脹，十分驚人，但相比56年來的樓價升幅，仍遠遠有所不及。至於個人薪酬嘛，1960年代中的中學畢業生如有幸考到政府初級文書一職，月薪好似係380元，今天有沒有30000元呢，答案當然是否定的。聖誕大餐這個故事有甚麼教訓？即時諗到嘅，就是退休儲蓄與投資必須以抵抗通脹為主要目標，退休後把所有退休金放入債券基金名為保本，但一定難升值，特別係當前利率相等於零嘅時候，咁即係搵自己笨，可能二十年後吃聖誕大餐也吃不起。今天六十歲退休的人，估計可活到九十歲或以上，除非是億萬富豪，一般中產拿着一筆退休金，非小心策劃，投資一些長期穩定收入而又抗通脹的證券不可。