英超球證卡頓保周二拎咗今年度環球足球頒獎禮嘅最佳球證，同時傳出中超打算向佢高薪挖角，請佢去中國執法。中超俾人印象係充滿貪腐同假波，所以佢哋諗住搵啲世界級裁判，希望改變吓形象。卡頓保今年執法歐聯同歐國盃兩項最重要賽事嘅決賽，絕對係當今球壇第一名哨。講番喺杜拜舉行嘅環球足球頒獎禮，呢年嘅大贏家係皇家馬德里，拎咗最佳球隊，佩雷斯就做咗最佳主席，基斯坦奴朗拿度（C朗）就大熱第三度贏得最佳球員。C朗唔得閒嚟拎獎，但佢透過視像電話講感受：「外界一直質疑我、皇馬同埋葡萄牙，但最後我哋都贏得冠軍。今年實在太不可思議，我要多謝隊友。」但最無厘頭嘅係大會搞咗個最佳中超球員獎，由廣州恒大嘅鄭智奪得。