2016年最後一期嘅《咖喱牛腩》，會同大家預測吓出年嘅球壇。小弟想寫吓中國同美國球壇，講吓對呢兩個大國聯賽嘅少少諗法。中超擺明已經係一個泡沫，真係唔知點收科，但嚟緊呢年應該未爆住嘅；至於美職聯呢幾年發展唔錯，隨美國經濟復蘇，影響力應該會越嚟越大。
美職聯係一個穩步成長嘅聯賽，慢慢做大個餅，再搵更多人一齊玩。《福布斯》喺2008年做過調查，當時得三支球隊賺錢，但去到2013年已經有10隊賺緊。雖然球隊越來越多，但每隊嘅收入都有增加，估值亦以倍數上升，例如FC多倫多（圖）八年前估值4,400萬美元，家陣已經升到2.45億美元。嚟緊新球季，美職聯又搵多兩隊入嚟分餅仔，分別係阿特蘭大聯同埋明尼蘇達聯，由20隊擴軍到22隊。特朗普上台後，美國進入加息周期，最近全球資金回流美元資產，同埋美元強勢，相信有助美職聯球隊發展同吸引歐洲球員過檔。美職聯穩步上揚嘅升值能力同收入水平，相信會吸引到更多商業機構參與。
如果美職聯係慢慢壯大，中超就係暴脹，隊隊背後都靠班主開水喉，唔可以自負盈虧。不過，一日習近平仲做緊主席，相信中超嘅繁華仲可以繼續落去，但過多四、五年後就唔夠膽講嘞。始終內地班富豪玩足球嘅目的都係投其所好，希望藉呢個熱潮齊齊搵足球以外嘅着數。用6,000萬去買個值3,000萬嘅球員，點解咁做？可以有乜着數？大家自己諗啦。另外，身為國企嘅上港仲咁積極掟錢增兵，應該代表政府仲係大力支持足球發展。
文：咖喱