明年係特區回歸20周年，愛國愛港陣營豈敢怠慢？廠商會就身先士卒，宣佈拎成2,000萬出嚟搞7個慶祝活動，夠晒乖啦！頭炮就係喺𠵱家維園搞緊嘅工展會做埋除夕倒數，迎接20周年來臨，而呢次只係開放畀獲邀嘅1萬位弱勢社群，每位弱勢社群仲有300蚊購物券，總算與民同樂。
除咗基層得益，普羅市民都有份，明年9月19日至10月3日十一黃金周期間會喺香港中央圖書館搞《基本法》墨寶玉石碑刻展覽，仲有回歸20周年攝影比賽，以及移師北京搞工展會、文物展等。
慶回歸活動嘅主事人係政務司司長林鄭月娥，八方問本身係梁粉嘅廠商會會長李秀恒咁幫手，係咪撐林鄭做特首？佢當然否認，仲話提名嗰陣主要考慮「發展經濟、改善民生」8個大字，同埋希望新政府可以延續到現屆政府嘅政策。