高路普嘅利物浦攻力強橫，無堅不摧，周二喺先落後一球之下，連入四球，主場以4:1大破史篤城，又升返上英超第二位。高路普嘅足球激情四射，佢教咗48場聯賽，紅軍就攻入100球，追平杜格利殊領軍嘅利物浦領隊最快聯賽百球紀錄。講番場波，雖然史篤城靠約拿芬禾達斯頭槌先開紀錄，但紅軍攻勢好猛，34分鐘由拉爾拉拿窄位射入追平，到完半場前更由羅拔圖法明奴攻入，反先2:1。換邊後，史篤城嘅恩保拿擺烏龍，中堅梳爾哥斯仲嚟吓「謝拉特式回傳」，傳畀後備入替嘅史杜列治射入個人今季聯賽首個入波，幫紅軍贏到4:1完場。利物浦喺2016年嘅英超已經攻入86球，係佢哋近30年聯賽入波最多嘅一年。
紅軍除夕會大戰曼城，一月二號就鬥新特蘭，兩軍主帥哥迪奧拿同埋莫耶斯都有入場吼路。
