林鄭將故宮分店塞過來西九文化區，不作諮詢的最大因由，自稱是怕公開後有人不認同，令中央尷尬。這樣子繞過立法會，加密得滴水不漏，上京簽字收貨，不是袋住先，直情幫香港袋袋平安。反對意見嗎？雖然林鄭唔會聽，但大家不肯閉嘴。財大氣粗的鄉黑率先發難，爆粗大罵，做乜唔益新界？明明可以將故宮擺係屏山祠堂，點會有鄉紳反對先！橫洲丫髻山下的棕地，都好風水過西九N倍，阿蛾，文化啊，你識條鐵！
富豪也有微言，鑑於獨立屋竊賊猖狂，故宮最佳落戶之處，必然是富豪聚居之地。貴州來的竊匪見到故宮矗立在別墅的更亭旁，盲都知勢色唔對，唔敢落手。
司長赴京接貨，發展局卻唔like，事關講好要全力發展郊野公園，點解故宮唔插旗？只要搵故宮打頭陣，鬆動郊野公園5%用地，其他地產項目食住上就得！國寶喎，文物喎，邊個說三道四，就是港獨餘孽！
最嬲嬲豬是兩個主題樂園，明知旅客大跌，好心俾件故宮大禮來贈興。海洋公園願意以十年前運到的熊貓交換故宮，熊貓去西九，故宮在海洋公園開枝散葉，吸客多過黃大仙！