聖誕節啱啱過咗，相信大家都收到唔少禮物，由曼城外借至西維爾嘅法國中場拿斯尼，就收到前女友Anara Atanes送上嘅靜脈維他命滴注服務，不過拿斯尼就喺個人twitter大爆同負責滴注嘅女醫生搞埋全套性服務，但最後又澄清黑客入侵亂講嘢，最好笑係之後有網站話前女友先係「黑客」，真係唔知拿斯尼係咪無辜。
自我發文強調「有下文」
靜脈維他命滴注有助恢復體力同保養身體，歐洲唔少球員都不時使用，西維爾中場拿斯尼趁住呢個聖誕假期嘆番吓都好合情合理，不過佢竟然大爆負責滴注嘅醫院仲有另類服務；周三朝早拿斯尼喺個人官方twitter留言，仲「@」埋滴注醫院個名大讚醫院：「你哋送上全套性服務，各位，你哋以後幫襯一定要確保都有呢啲服務呀；個妓女搞足我成晚，你哋要知道女醫生做完滴注後，仲會有其他服務。」
拿斯尼慌死人哋唔信咁，之後仲打多兩段留言，一段就話前女友幫佢安排呢次滴注，女醫生之後做完滴注後就問佢攞電話號碼，之後一齊去酒店房大戰。另一段仲話自己講緊嘅係100%事實，女醫生三點鐘到佢間房，不過賬單就冇顯示有呢啲特別服務。
疑遭前女友報復
29歲嘅拿斯尼同女醫生搞埋一齊，原本都係佢哋之間嘅事，不過如果講到醫院藉滴注之名變相賣淫，咁就大鑊好多，醫院變妓院，搞到呢間「Drip Doctors」即時出嚟澄清，話拿斯尼嘅留言完全唔係真實，而且拿斯尼之後亦話，因為自己嘅twitter被黑，所以有人試圖散播謠言，呢啲留言都係假嘅，仲要向所有被牽涉嘅人致歉。網站101greatgoals最新仲大爆，黑客本身就係佢嘅前女友Anara Atanes，呢位模特兒係唔係唔忿氣被飛，所以藉呢單嘢報復呢？