本地波曾經因為港隊喺世界盃外圍賽嘅好成績，包括兩度賽和中國，掀起過一陣子小陽春，不過熱潮過後有啲打回原形嘅感覺，聖誕節期間兩場銀牌準決賽，戲碼都唔係差，有傑志同東方兩支班霸分途出擊，不過入座人數都係兩、三千人。其實小弟之前都狂想過，香港雖然只係彈丸之地，不過不乏跨國企業，佢哋每年用於宣傳、廣告費用真係億億聲，拎十幾二十個巴仙出嚟，各自搞一支本地波，已經夠晒競爭力啦。
不過正所謂牛唔飲水點撳得牛頭低，商業機構都係利字行先，逼唔嚟；放眼世界，紅牛係最積極搞波嘅大企業，本身佢呢隻能量飲品都同體育掛鈎，所以咁多年都染指唔同運動，由極限運動到最燒錢嘅F1（圖）都有搞，不過可能佢哋覺得搞足球效用較大，隨時隊波有好成績有錢賺，仲可以回饋公司，𠵱家奧地利、美國、巴西、德國，都有紅牛所屬球隊，最近仲想進軍英超，送佢哋一對翼。
講真以英超頂級班霸，好似曼聯、曼城、車路士等等，班主都身家豐厚，要收購佢哋真係唔易，不過好在英超行呢個「大鑊飯」政策，巨額直播收益都分得幾平均，就算中下游球隊，計埋門票、贊助等收益，以億鎊計，管理得好，真係唔難賺錢。而且擁有多支球隊嘅紅牛，更加可以發揮協同效應，各隊多餘球員又可以借嚟借去，慳番唔少轉會費。紅牛𠵱家就講緊收購韋斯咸或者水晶宮，而且睇佢哋部署，玩埋西甲、意甲都唔奇，紅牛集團如果真係成功，可能開創未來球會擁有權嘅新制度。文：牽牛