北風起，三蛇肥。唔少工會都按傳統，喺年尾舉辦蛇宴聯歡。工會蛇宴最享負盛名，非勞聯群生飲食技術人員協會莫屬。群生前晚首次舉辦慈善蛇宴，各星級大廚出馬，鵝肝醬乳豬、蟹皇竹笙，當然唔少得蛇羹，連碗紅豆沙都係用上60年陳皮。
前晚場慈善蛇宴筵開12席，每席6,000元，席間仲有義賣，包括著名導演李力持捐出「中國文化名家」郵票珍藏，以及有「地圖大王」之稱、北京大學客席教授譚兆璋捐出畫作「春景常開」，後者義賣得11,888元，夠好意頭。全晚籌得逾10萬元善款，不扣除成本，全數捐畀勞聯智康協會旗下英才賽馬會教育中心，用嚟添置設備，培訓更多飲食業人才。
本身係大廚嘅群生理事長許美德同八方講，群生有1,778名會員，希望會員日後多啲走出廚房，回饋社區。