12月中宣佈參選特首的葉劉，競選海報一個無「貝」嘅「贏」字，除咗被網民抽水恥笑，連民建聯創黨主席曾鈺成（圖）亦喺《am730》影片欄目「字言字語」抽埋一份，令葡萄都就快變成提子乾。
阿曾噚日以「無貝點『贏』？」為題，講解「贏」字如何從象形字演變至現今寫法，話「贏」原本嘅象形文字，係解作一班人撐船出海，拾回大量貝殼滿載而歸之意，「即係做生意賺到錢」。
阿曾話後來「贏」不斷演化，但當中個「貝」字一直保留、唔少得，「因為要贏，錢銀係好緊要」。阿曾片尾更明寸葉劉，佢話喎：「最近有人將呢個字改咗作為競選標誌，但連個『貝』字都唔見咗。似乎贏唔贏得到，就好有疑問嘞！」唔知葉劉睇到，會否諗諗喺競選海報加番個「貝」字呢？