用咗45年嘅荃灣裁判法院上周五光榮退役，接手嘅西九龍法院（圖）噚日正式投入服務。呢棟耗資27億興建嘅新大樓有落地大玻璃，出面睇確係美輪美奐，但首日運作就俾人投訴，同南港島綫一樣，話啲𨋢出事，原因係太慢。
話說樓高11層嘅A座有4部𨋢，以為一定夠使，點知啲𨋢就慢吞吞，搞到班律師等到好唔耐煩。記者測試過如果喺地下搭上11樓，中間唔停都要40秒。好在負責處理大量新案嘅一號法庭喺4樓，有扶手電梯上，如果唔係啲被告因為遲到而俾人充公保釋金就唔抵喇。
嚟緊死因裁判法庭同埋淫褻物品審裁處，都會陸續入伙，司法機構真係要聯絡吓啲機電工程師傅，校快啲部𨋢，無理由成棟大樓有電子地圖又有電子螢幕播放審訊表，但要人跑樓梯㗎嘛。八方問咗司法機構，發言人就話呢棟大樓好多係法庭樓層，咁法庭樓層比一般辦公大樓樓底高，所以你以為係11層樓，其實有17層樓咁高㗎。