大熱Win呢幾場枕住開，繼第五、六場「喜悅繽紛」及「精彩樂韻」後，第八場三班1000米直路賽，再有「翩翩」呢匹新勝馬2.2倍連捷，組合獨贏A1派14元正。「翩翩」的一對得勝練、騎蔡約翰同潘頓，之前分別贏出「喜悅繽紛」及「精彩樂韻」，第八場賽後兩人分別起孖，鬥拆聖誕禮物！
四歲新西蘭自購新馬「翩翩」上季兩戰兩亞，今季則「四戰」全勝無堅不摧（其中一場因閘廂問題，賽事宣告無效），成為繼姚本輝馬房「旌暉」後，季內另一匹出賽未敗之師，其進步程度可想而知。「翩翩」本身於直路賽三戰兩冠一亞冇失Q。向來美艷的「翩翩」馬主黃言信太太，賽後又與丈夫現身凱旋門，再度成為焦點所在。
蔡約翰今日起孖，累積連勝三次賽事未斷纜，季內增至26場頭馬，追平原本一直領先的蘇偉賢，僅因亞軍次數不及後者而屈居次席。至於「翩翩」騎師潘頓下月3日34歲牛一，這天起孖亦給自己提前送禮。
第八場開出熱頭冷腳，二至四名都係冷門，順序為「良才」、「真心意」及「平天下」，四重彩派十萬七千幾。