真係不得不佩服民建聯立法會議員蔣麗芸，臨近年尾都標尾會，又再成為網民焦點。雖然用國語宣誓就任議員咬字唔正，但一向語出驚人大賣愛國心嘅元秋，噚日喺facebook專頁話有首紅歌令佢聽到流淚喎，呢首歌就係愛國歌手張明敏主唱嘅《我的中國心》，「河山只在我夢縈 祖國已多年未親近」，唔少網民話擦鞋到暈。
元秋喺fb以「我的中國心 我的中國印」為題，分享一段內地綜藝節目嘅片段，片中一名七情上面嘅小朋友高歌《我的中國心》，留言：「每次聽到這歌曲，我會流淚……」佢話自己1983年首次去內地，「眼看當時落後的內地，心裏湧溢着說不出的酸痛，看到家鄉農田裏與我同齡的女孩，我慶幸生於香港」，因此聽親呢首歌都忍唔住喊喎。
「如執政黨倒下 社會就亂」
佢自爆當年問過擔任國民黨上校嘅老竇蔣震可以為國家做啲乜？「父親說：國家要發展，就靠今天的執政黨，如果執政黨倒下，社會就亂，老百姓生活會更苦；作為香港人，為了國家發展，為了同胞有更好的民生就必須積極貢獻……我們沒有選擇……因為祖先早已把我們的一切烙…下…中…國…印…。」嘩，講到呢度八方都有啲毛管戙，仲凍過噚日急降嘅天氣……
識睇睇留言
Ngan Pepe：愛念在心不在口，信口雌黃味更濃
白日夢：X~又係D假愛國嘅人，真愛國者一定回國，為國家盡力...
Daniel Sung：記者大哥哥可唔可以就帶埋喇叭响佢面前播，睇下佢係咪真係哭出來。
KT Chau：1983年才首次回內地，太遲了，咁羞恥都講得出，他的家庭點愛國呀？
Wong Peter：佢老竇係國民黨喊乜X？
Alan Man：吾知港英年代蔣婆婆你聽緊d咩、唱緊d咩！斷估唔會系什麼中國心lor
Boeing Charles：點解仲留係香港？
資料來源：《蘋果》網頁
李八方
mailto:[email protected]