早排明星夫婦張繼聰同謝安琪，為咗一套日本漫畫《男兒當入樽》係邊個買，都拗到面紅耳熱，就知呢本關於籃球嘅漫畫有幾崇高地位。漫畫主角櫻木花道除咗搶籃板叻，另一個絕技就係下手拋大石式罰球。周一NBA拆禮物日比賽，火箭新秀安奧阿古（Chinanu Onuaku）就用拋大石方式射入兩個罰球，唔通佢又向櫻木花道致敬？
保罰球百分百命中率
火箭周一主場對太陽，去到第四節已經有廿幾分優勢，進入「垃圾時間」。教練迪安東尼換入今年新加盟嘅大前鋒安奧阿古上陣。安奧阿古喺最後2分46秒博到太陽前鋒阿倫威廉士（Alan Williams）犯規，有兩個罰球。大家最期待嘅畫面出現，安奧阿古唔係用傳統上手投籃，而係以拋大石方式嚟射。你唔好理安奧阿古射姿奇怪，但兩個罰球都入晒，加盟NBA至今保持100%罰球命中率㗎，火箭最終亦以131:115大勝。
向名宿歷克巴利偷師
雖然《入樽》紅遍全球，連「一剔」都出過對「入樽X飛人六代」波鞋，但安奧阿古今次就唔係向櫻木致敬。話說佢讀路易斯維爾大學第一年，都係以一般籃球員嘅上手投籃方式射罰球，但命中率就只得46.7%。路大教練柏天奴（Rick Pitino）就畀啲NBA名宿歷克巴利（Rick Barry）嘅射罰球短片佢，叫佢好好學習，最終改射姿仲進步到59.6%。歷克巴利6、70年代打過勇士、火箭等球隊，入選過12次明星賽，拋大石罰球仲好準，歷來命中率達89.3%㖭。出晒名罰球命中率好低嘅快艇中鋒D佐敦（DeAndre Jordan）、鷹隊中鋒懷特侯活（Dwight Howard），又不如學吓佢練吓拋大石啦。